jarduerak

BBK BILBAO Music Legends Fest jaialdi ospetsuak Begoñako Galeriak eta Sestaoko Labe Garaia aukeratu ditu Bilboko itsasadarrari lotutako “mitozko” ondare modura, eta horietan aurkeztuko du 2024rako programazioa.

Jaialdiaren “Warming Up”-aren barruan eta joan den larunbatean (maiatzak 4) Sestaon egindako girotze-kontzertuen ondoren, datorren ostiralean, hilak 24, McENROE getxotarrak Begoñako Galerietan arituko dira 20:00etan, eszenatoki guztiz berezian, zaharberritze monumentaleko testuinguruan eta Kantauri itsasoaren eta urte sasoi honetako ilunabar magikoen ikuspegi pribilegiatuekin.

McENROEk bikote akustiko formatuan emango du kontzertua, hiri-eremu monumental batera egokituta eta edukiera txikiarekin, zaharberritze-prozesua dela eta.

Interesa dutenak dohainik joan ahal izango dira kontzertura, Punta Begoña Fundazioaren webgunean (www.puntabegonagetxo.eus) izena emanda. Plazak banatzeko, zorrotz errespetatuko da izen-ematearen ordena, lekua bete arte. 

BBK Bilbao Music Legends Fest jaialdiaren antolatzaileek Begoñako Galeriak aukeratu dituzte, “Euskadiko arkitektura-lanik esanguratsuenetako bat baita, ehun urtetik, gorakoa, bere kokapen eta eraikuntza bereziak direla eta”.

BBK Bilbao Music Legends Festak jaialdia Bizkaira hedatzeko gune monumentalen artean hautatzeari esker, Begoñako Galeriek bat egingo dute bertan garatzeko gune bikaintzat jotzen duten kultur eta gizarte-arloko proposamen ugariekin, eta kulturaz, artez eta prestakuntza- eta gizarte-jardueraz betetzen dute, zaharberritze-lanek aurrera egiten duten bitartean.

“Mitozko ondareetan” egindako emanaldi horiek BBK Bilbao Music Legends Fest jaialdiaren atarikoak dira. Aurte, Deep Purple eta Pretenders mitikoak ditu kartelburu, eta ekainaren 14an eta 15ean egingo da Bilbon.