Punta Begoña Galerietan Lehen Hezkuntzako 5. eta 6. mailako 200 ikasle inguru izan dira zientzia lanaren errealitatea lehen eskutik aztertzen, azaroaren 2an eta 4an, UPV/EHUko Zientzia, Teknologia eta Berrikuntzaren XVI. Astean.
“Punta Begoñako ezkutuko sekretuak” izenburupean, tailer guztiek ildo nagusi bat jorratu dute: galerian gaur egun egiten ari diren azterlan zientifikoaren prozesua. Hala, ikasleek askotariko materiala aztertu ahal izan dute: agiriak, planoak, argazkiak, ikus-entzunezko euskarriak, artxiboak, margoak eta beste. Modu horretan, eraikinaren historia ulertu ahal izan dute eta ikusi dute UPV/EHUko ikertzaileak nola ari diren hura ikertzen.
Ikasleek hiru jarduera mota landu dituzte ikerketa lanak egiteko: tailer ikonografiko bat, eraikinak bere dekorazioaren bitartez eman dezakeen informazioa interpretatzen ikasteko; tailer dokumental bat, artxiboko lanen teknikak eta lanon zailtasunak deskubritzeko; eta lekukotasun tailerra, memoria sozialak ondareari balioa emateko duen garrantzia agerian jartzeko.
Tailerretan, parte hartzeko jolasak eta dinamikak erabili dira, printzipio zientifikoak oinarri hartuta; esaterako, arrazonamendu hipotetiko-deduktiboaren erabilera, teoria bat osatzeko ebidentzien batura, informazioa zorrotz erregistratzeko prozesu baten garrantzia…
Zientzia Astea, Zientziaren, Teknologiaren eta Berrikuntzaren Astea alegia, Universidad del País Vasco / Euskal Herriko Unibertsitateak antolatzen du, gazte eta helduek, haurrek edota inguruarekiko jakin-mina duten pertsona guztiek aukera izan dezaten zientzia ikusteko, entzuteko, sentitzeko eta eztabaidatzeko egunero-egunero zientzian aritzen direnekin.
Informazio gehiago: http://zientzia-astea.org
