Joan den martxoaren 6an, Sonia Pérez Ezquerra Garraio, Mugikortasun eta Turismoko foru diputatuak “IRON RIVER. Burdinatik titaniora ” ekimena aurkeztu zien Bizkaiko eskualdeetako turismo-arduradunei.
Proiektu honek Nerbioi itsasadarraren industria-ondarea balioztatu eta zabaldu nahi du, ondare hori metropoliko egitura-ardatz bihurtzen den une honetan, Bilbo eta itsasoa lotzen dituen oinezkoentzako eta bizikletentzako bulebarra sortuz eta etorkizuneko ALL IRON zubiaren bidez ezkerraldearekin lotuz.
Produktu turistiko berriak hainbat ibilbide diseinatzen ditu, eta ibilbide horietan zehar gure historia industriala eta gune bakoitzeko kultura edo gastronomia erakargarriak ezagutu ahal izango dira.
Getxoren kasuan, aipatutako oinezkoentzako eta bizikletentzako Bilborekiko konexioak, ibai-bidea indartzearekin batera, trakzio-elementu garrantzitsua ahalbidetzen du bi udalerrien artean turismo-sinergiak sortzeko.
Punta Begoña Galeriak proiektuaren parte garrantzitsua izan dira bere sorreratik, batetik, Abraren itsasadarraren lekuko historiko gisa duten kokapen estrategikoagatik, eta, bestetik, Horacio Echevarrieta sustatzaileak Bizkaiko industria eta ekonomiaren aireratzean izan duen funtsezko paperagatik ere.
Punta Begoñak proiektuan duen garrantzia, produktu berriaren euskarrietan eta katalogoan islatzen da, bere erdiko koadernotxoan Galerien argazki izugarria barneratzen duelarik.
