Galeriek eta Itsasmuseum Bilbaok Nerbioi itsasadarreko bizimoduei buruzko erakusketa aitzindaria antolatu dute

Bihar larunbatetik, hilak 9, eta urriaren 8ra arte, “Nerbioi Itsasadarra. Mareen arteko bizitza. La Ría del Nervión. La vida entre mareas” izeneko erakusketa bisitatu ahal izango da Punta Begoñako Galerietan eta Bilboko Itsasmuseumean. Punta Begoña Fundazioak, Getxoko Udalaren eskutik, Itsasmuseum Bilbaoren lankidetza estuarekin, Eusko Jaurlaritzaren babesarekin eta ondarearen benetako zaindari diren pertsona eta erakundeen laguntza eskergarekin, erakusketa hau antolatu du, memoria bizi hau aldarrikatzeko, indartzeko eta zabaltzeko abiapuntu bat dena, gure mugen barruan eta kanpoan.

Erakusketa aitzindari honek Nerbioi Itsasadarreko bizimoduak islatzen dituzten argazkiak, dokumentuak, ikus-entzunezkoak eta testigantzak biltzen ditu: lanbideak, zaletasunak, lehiaketak, jaiak, sinesmenak, tradizioak eta abar, mendeetan zehar gure egunetara askotan iritsi direnak. Oro har, norberarekiko izaera eta harrotasuna eratzen lagundu duten bizipenak dira.

Erakusketaren osagarri gisa, bisita gidatuak egingo dira.

“Proiektu honekin, Punta Begoña Fundaziotik, gizarte gisa batzen gaituen ondarea zaintzeko beharrari buruzko ohartarazpena egin nahi dugu. Baina baita transmititu beharraz ere, eta, horretarako, jende guztiari eta ikastetxeei zuzendutako bisitekin osatuko dugu erakusketa. Eta emakumeek eta gizonek bilakaera historikoan eta etorkizunean izan duten eta duten zeregina ikusarazteko beharrari buruz.

Horregatik, erakusketa koral, parte-hartzaile eta irekia diseinatu dugu, itsasadarra ingurune gizatiarragoa, bizigarriagoa eta iraunkorragoa izan dadin, Punta Begoña Fundazioak garapenaren aldeko nazioarteko helburuekin duen konpromisoari jarraiki.”

Ignacio Uriarte, Punta Begoña Fundazioaren patronatuko kidea

Erakusketa, beraz, itsasadarreko bi leku estrategikotan egongo da: Punta Begoña eta Bilboko Itsasmuseum.

Punta Begoñako Galeriek erakusketaren eduki nagusia erakutsiko dute, eta irudi harrigarriak eskainiko dituzte, artxibo publiko eta pribatu askotan egindako ikerketa-lan luze baten emaitza. Halaber, lekukotasunak, pasadizoak eta istorioak ere erakutsiko dituzte, protagonistekin eta ondare baliotsu hori babesteko borrokan ari diren pertsona eta erakundeekin egindako elkarrizketen bidez.

“Nortasun propioa da, indartsua baina integratzailea, munduari irekia, eta erakusketa honetan oso ondo islatzen diren izaera, ohiturak eta erabilerak sortu ditu. Itsasadarrean sartzen da Bilbon bizi dena edo Getxon bizi dena, hirian bizi dena edo landa-eremuetan bizi dena, eskuinaldean bizi dena zein ezkerrean bizi dena”.

Jon Ruigómez, Bilboko Itsasmuseum zuzendaria

Dozenaka eragileren, erakunderen, elkarteen, artxiboren –hala nola aholkuak eskaini eta bere fondo grafikoa gehitu dituen Getxoko liburutegiaren– eta partikularren arteko lankidetza horrek erakusketa korala, irekia eta parte-hartzailea bihurtzen du, kultura-ondare bakarra aintzatesteko eta balioesteko oinarriak jarri nahi dituen proiektu baten barruan.

Eta itsasadarrean zehar egindako bidaia horren barruan, memoria biziaren mapa osatuz, Punta Begoñak eta Getxok funtsezko zeregina dute. Itsasadarreko Abran duen talaia pribilegiatutik, Punta Begoñak milaka urtez ikusi du jendearen joan-etorria, urruneko arrantzarako itsasoratzeak, merkataritza, emigrazioa, meatzaritzatik eta industriatik eratorritako nabigazioa, kirol-lehiaketak, prozesioak, festak edo etsaien erasoen aurrean gure lurraldearen defentsa.

Eta bizimodu horien konfigurazioan, Getxo lekuko ez ezik protagonista nagusi ere izan da tradizioetan eta adierazpenetan, lanbideetan eta itsasoari lotutako festetan, zeinak, era batera edo bestera, gaurkotasuna izaten jarraitzen duten eta erakusketa honetan islatzen diren irudi eta testigantzen bidez.

Bestalde, Itsasmuseum Bilbaok ere –galeriek bezala, Itsasadarraren leku estrategikoa– aldi berean hartuko du erakusketa. Horrela, proiektua Bilboko museoaren egoitzako kanpoko eta barruko espazioetan ikusaraziko da, eta irudiaren benetako arkeologia osatzen duten ikus-entzunezko materialak ere gehituko dira.